سنڌ ۾ آباد 27 لک افغانين کي واپس پنهنجي ڏيھه هلندڙ سال موڪلڻ، اڳ واٽ اجازت نامي کانسواءِ هاڻ صوبي ۾مدرسا، مسجدون ۽ عبادتگاهون تعمير نه ٿي سگهنديون، سرڪاري زمين تي قائم ٿيل پابندي مڙهيل تنظيمن جي مدرسن، مسجدن، خطيبن ۽ کٿابين جا مڪمل تفصيل تيار ڪرڻ لاءِ صوبي جي ڪمشنرن ۽ ڊپٽي ڪمشنرن کي حڪم جاري . دهشت گردي ۾ ملوث جوابدارن لاءِ الڳ جيل قائم ڪرڻ جو اعلان جڏهن ته سنڌ گھرو کاتي نادرا سان ڪرائيم ٽريڪنگ ٺاھ ڪيو آهي جنهن سان ڏوهارين جو رڪارڊ جوڙيو ويندو ، صوبي ۾ دهشت گردي روڪ سيل قائم ڪيو ويو آهي جنهن جو هيڊ ڪواٽر ڪراچي ۾ هوندو حيد رآباد ۽ سکر ۾ ريجنل آفيسون جوڙيون وينديون، اهڙو اعلان ڪالھه سنڌ جي گھرو سيڪريٽري ڪبير قاضي جي صدارت ۾ ايپڪس ڪميٽي جي صوبائي عملدر آمد ڪميٽي جي اجلاس ۾ ڪيو ويو آهي . اجلاس کي افغانين بابت ڪمشنر آغا غضنفر ٻڌايو ته سنڌ ۾ 27 لک افغاني پناھ گير غير قانوني طور آباد آهن جن مان 68 هزار کي رجسٽرڊ ڪيو ويو آهي .رجسٽرڊ افغانين مان هڪ به ڪنهن ڏوھ ۾ ملوث ناهي ، 31 ڊسمبر 2015 تائين کين واپس پنهنجي وطن موڪليو ويندو ، اجلاس کانپوءِ ميڊيا سان ڳالهائيندي گھرو سيڪريٽري ڪبير قاضي ٻڌايو ته سنڌ ۾ 27 لک افغاني پناهگير غير قانوني آباد آهن. انهن مان 68 هزار کي رجسٽرڊ ڪيو ويو آهي ، باقي جي رجسٽريشن ڪري انهن کي شهرن کان ٻاهر ڪيمپن ۾ آباد ڪيو ويندو ، هن چيو اسان ڪنهن کي به ڊيڄارڻ ۽ هيسائڻ نٿا چاهيون، انهن کي عزت ڀري انداز ۾ پنهنجي ڏيھه واپس موڪليو ويندو ، هلندڙ سال ڊسمبر تائين انهن کي واپس موڪليو ويندو ، . هن ٻڌايو ته صوبي ۾ دهشت گردي تي ضابطو آڻڻ لاءِ گھرو کاتي ۾ هڪ دهشت گردي روڪ سيل قائم ڪيو ويندو، جڏهن ته حيدر آباد ۽ سکر ۾ ان جون ريجنل آفيسون به قائم ڪبيون ته جيئن قومي ايڪشن پلان تي عمل ڪرائي سگھجي ۽ صوبي مان دهشت گردي کي ختم ڪري سگھجي، هن ٻڌايو دهشت گردن لاءِ الڳ جيل به قائم ڪرڻ جو فيصلو ڪيو ويو آهي ، هن ٻڌايو ته سرڪاري زمين تي پابندي مڙهيل تنظيمن جا جيڪي به مدرسا ، مسجدون ۽ عبادتگاهون قائم ٿيل آهن انهن جا انگ اکر گڏ ڪرڻ لاءِ صوبي جي سمورن ڪمشنر ، ڊپٽي ڪمشنرن کي هدايت ڪئي وئي آهي . جڏهن ته ان سان گڏ خطيبن ۽ کٿابين جا انگ اکر به گڏ ڪيا ويندا ، هن ٻڌايو ته هاڻ وڌيڪ ڪا به مسجد ، مدرسو يا عبادتگاھ قائم ڪرڻ کان اڳ سنڌ حڪومت جي گھرو کاتي کان اجازت نامو حاصل ڪرڻ کانسواءِ اڏاوت نه ٿي سگھندي ، آذان کانسواءِ لائوڊ اسپيڪر جو استعمال نه ٿي سگهندو ، هن چيو ته غير رجسٽرڊ مدرسي ، مسجد يا عبادتگاھ کي ڊاهيو ويندو . هن ٻڌايو ته 85 ڪيس وفاقي گھرو کاتي کي موڪليا ويا آهن جن مان 68 ڪيس فوجي عدالت ۾ موڪلڻ جي منظوري ملي وئي آهي . هن چيو ته 6 ڄڻن کي ڦاهي ڏيڻ لاءِ بليڪ وارنٽ جلد جاري ڪيا ويندا، هن ٻڌايو ته ڪورآرڊينيشن ڪميٽين ۾ ايس پيز به ميمبر طور شامل هوندا،هن ٻڌايو ته رڳو سنڌ پوليس ۾ سياسي مداخلت ناهي اها ٻين صوبن ۾ به آهي . اسان پوليس جو ميرٽ تي مقرريون ، بدليون ڪندا آهيون . ان موقعي تي ڪراچي جي ايڊيشنل آءِ جي غلام قادر ٿيٻو ٻڌايو ته دهشت گردي کي روڪڻ لاءِ هڪ هزار نوجوانن تي ٻڌل فورس جوڙيو پيو وڃي ، نادارا سان ڪرائيم ٽريڪنگ ٺاھ ٿيو آهي . اهي اسان کي سسٽم فراهم ڪندا جيڪو ايڊيشنل آءِ جي ، ڊي آءِ جيز جي آفيسن ۽ ٿاڻن تي لڳايو ويندو ، هر ڏوهاري جون فنگر پرنٽ ورتا ويندا . انهن جو رڪارڊ جوڙيو ويندو ، هن چيو ته ڪراچي ۾ ٽارگيٽ ڪلنگ ، ڀنگ لاءِ اغوا جي وارداتن ۾ گھٽتائي آئي آهي جڏهن ته بينڪ جي ڦر واريون وارداتون هاڻ ختم ٿي ويون آهن . هن چيو ته ا سڪول حملي ۽ شاگرد کي اغوا ڪري ساڙڻ واري واقعي ۾ طالبان کي ملوث ڪرڻ واري واويلا اجائي آهي . ان ۾ ڪي ٻيا هٿ ملوث آهن ، ڪراچي جون حالتون سازش ذريعي خراب ڪرڻ جي ڪوشش ٿي رهي آهي.