پشاور (م.ڊ) مائيڪرو سافٽ جي باني بل گيٽس تحريڪ انصاف جي چيئرمين عمران خان کي خيبرپختونخواهه صوبي ۾ صحت جي منصوبنجي نگراني لاءِ جديد سيٽلائيٽ سسٽم فراهم ڪرڻ جي پيشڪش ڪئي آهي، بل گيٽس طرفان عمران خان کي لکيل خط ۾ خيبرپختونخواهه صوبي ۾ پوليو سميت ٻين بيمارين جي خاتمي لاءِ عمران خان جي ڪوششن جي تعريف ڪندي چيو ويو آهي ته پوليو خلاف اوها جو عزم ڏسي اسان جي حوصلا افزائي ٿي ۽ ان مان ظاهر ٿئي ٿو ته پوليو جو خاتمو انسانيت لاءِ ڪيتري وڏي ترجيح آهي هن چيو ته اها ڳالهه خوشي جوڳي آهي ته وفاقي، صوبائي حڪومتون ۽ هٿياربند فوج ”صحت جو اتحاد“ پروگرام تحت ڪم ڪري رهيا آهن جنهن ۾ وڌيڪ بهتري لاءِ خيبرپختونخواهه ۾ صحت جي منصوبن جي اثرائتي نگراني لاءِ جديد ترين سيٽلائيٽ ٽيڪنالوجي فراهم ڪرڻ چاهيون ٿا جيڪا نائيجيريا ۾ به پوليو جي خاتمي لاءِ ڪاميابي سان استعمال ڪئي وڳئي آهي ۽ ان جي مدد سان ڊاڪٽرن، اسپتالن جي بروقت ۽ اثرائتي نگراني ٿي سگهي ٿي. بل گيٽس خط ۾ عمران خان کي مخاطب ڪندي وڌيڪ چيو ته اوهان جي سڌي سنئين نگراني پاڪستان مان پوليو جي خاتمي لاءِ ضروري آهي، اوهان جي چيف سيڪريٽري ۽ خيبرپختونخواهه جي وڏي وزير پرويز خٽڪ سان ڳالهه ٻوهه پوليو جي خاتمي جي مهم هلائڻ ۾ مددگار ثابت ٿيندي ۽ ان حوالي سان اوهان سان ڳالهائڻ لاءِ ڊاڪٽر وقار اجمل کي ذميواري ڏني وئي آهي.