لاهور (اسپورٽس نيوز) اڳوڻي ٽيسٽ ڪرڪيٽر اقبال قاسم کي پاڪستان ڪرڪيٽ بورڊ جي ڪرڪيٽ ڪميٽي جو سربراهه مقرر ڪيو ويو آهي.پي سي بي 2018ع ۾ محسن حسن خان جي سربراهي ۾ ڪرڪيٽ ڪميٽي جوڙي هئي پر گذريل سال محسن حسن خان جي ڪميٽي کان ڌار ٿيڻ بعد چيف ايگزيڪٽو پي سي بي وسيم خان ڪميٽي جو چيئرمين بڻيو هو.گذريل سال ڊسمبر ۾ وسيم خان ڪميٽي کان ڌار ٿي ويو هو ۽ گھٽ ميمبرن تي ٻڌل آزاد ڪميٽي جوڙڻ جو فيصلو ڪيو ويو هو .۽ هاڻ پاڪستان طرفان 50 ٽيسٽ ۽ 15 ون ڊي ميچون کيڏندڙ اڳوڻي ڪرڪيٽر اقبال قاسم کي ڪرڪيٽ ڪميٽي جو سربراهه مقرر ڪيو ويو آهي. هن سان گڏوگڏ اڳوڻي فاسٽ بالر عمر گل ۽ اڳوڻي ٽيسٽ ڪرڪيٽر علي نقوي کي ميمبرن ۾ شامل ڪيو ويو آهي.ان کان سواءِ اڳوڻو ڪپتان وسيم اڪرم ۽ چيف سليڪٽر وومن ڪرڪيٽ ٽيم عروج ممتاز ڪميٽي ۾ برقرار آهن جڏهن ته چيف ايگزيڪٽو وسيم خان ۽ ڊائرڪيٽر انٽرنيشنل ذاڪر خان ڪميٽي جا ميمبر هوندا.ان کان اڳ ڪميٽي ۾ ڊائرڪيٽر ڊوميسٽڪ ڪرڪيٽ هارون رشيد ۽ ڊائرڪيٽر اڪيڊميز مدثر نذر به ڪميٽي ۾ شامل هئا.ڪرڪيٽ ڪميٽي جي هر معاملي تي تجويزون تيار ڪري چيئرمين احسان ماني کي موڪليندي.چيف ايگزيڪٽو وسيم خان جو چوڻ هو ته ڪرڪيٽ ڪميٽي مڪمل آزاد آهي جيڪا پاڪستان ۾ ڪرڪيٽ جي بهترين لاءِ مشورو ڏيندي.ڪميٽي جي چيئرمين اقبال قاسم جو چوڻ هو ته اهم ذميواريون ڏيڻ تي پي سي بي جو ٿورائتو آهيان، ڪميٽي ۾ شامل باصلاحيت ماڻهن سان گڏجي تجويزون تيار ڪنداسين.