جوهانسبرگ(اسپورٽس نيوز) مشهور بيٽسمين هاشم آملا کي ڏکڻ آفريڪن حڪومت طرفان شاندار ڪارڪردگي تي آرڊر آف ايڪامانگا ايوارڊ سان نوازيو ويو آهي.ڏکڻ آفريڪا جي مسلمان ڪرڪيٽر هاشم آملا کي ڪرڪيٽ ۾ شاندار ڪارڪردگي تي ڏکڻ آفريڪي حڪومت طرفان قومي ايوارڊ سان نوازيو ويو آهي.هو آرڊر آف ايڪامانگا ايوارڊ حاصل ڪندڙ پهريون پروٽيز بيٽسمين آهي، ان کان اڳ فاسٽ بالر شان پولڪ ۽ مکايا نتيني کي به اهو ايوارڊ ڏنو ويو آهي.اهو ايوارڊ ڏکڻ آفريڪا جي وڏي قومي ايوارڊ مان هڪ آهي جيڪو آرٽس، ڪلچر، ادب، موسيقي، صحافت ۽ اسپورٽس ۾ شاندار ڪارڪردگي ۽ خدمتن تي ڏنو ويندو آهي.آملا ڏکڻ آفريڪا طرفان 117 ٽيسٽ، 164 ون ڊي ۽ 43 ٽي ٽوئنٽي انٽرنيشنلز کيڏيون آهن ۽ مجموعي طور تي 17794 رنسون اسڪور ڪيون آهن، هو ٽيسٽ ڪرڪيٽ ۾ ڏکڻ آفريڪا طرفان ٽرپل سينچري ٺاهيندڙ واحد بيٽسمين پڻ آهي، هن انگلينڊ خلاف اوول ۾ 311 رنسن جي ناقابل شڪست اننگز کيڏي هئي.
