افغانستان ۾ مستقل امن پاڪستان جي معيشت تي هاڪاري اثر وجهندو: عارف علوي

گوادر  (اي پي پي) صدر ڊاڪٽر عارف علوي موجود سامونڊي وسيلن کي قومي مفاد ۾ استعمال ڪرڻ ۽ بليو اڪانومي کي استعمال ۾ آڻڻ جي عزم جو ورجاءُ ڪندي چيو آهي ته اسان کي علائقائي رابطن ۽ واپار کي وڌائڻ جي ضرورت تي پڻ ڌيان ڏيڻو پوندو. افغانستان ۾ مستقل امن سان پاڪستان جي معيشت تي مثبت اثر پوندا، سيڪيورٽي فورسز کي به سائبر حملن کان بچاءَ لاءِ تيار رهڻو پوندو. اهڙن خيالن جو اظهار هن جمعي ڏينهن گوادر ۾ سيڪيورٽي فورسز جي آفيسرن ۽ جوانن کي خطاب ڪندي ڪيو. ايوان صدر جي ميڊيا ونگ موجب پنهنجي خطاب ۾ صدر چيو ته پاڪستان سامونڊي وسيلن ۽ بليو اڪانومي جي استعمال لاءِ پرعزم آهي، گوادر پورٽ نه رڳو اقتصادي پر دفاعي لحاظ کان به اهم آهي. هن چيو ته وچ ايشيائي ملڪن سان واپاري رستا بهتر ڪرڻ جي ضرورت آهي، علائقائي رابطن ۽ واپار جي فروغ سان گڏ سامونڊي معيشت تي ڌيان ڏيڻ جي ضرورت آهي. صدر چيو ته وچ ايشيائي ملڪ افغانستان کان گوادر بندرگاهه ذريعي واپار جا خواهشمند آهن، افغانستان ۾ 40 سالن کانپوءِ امن آيو آهي، افغانستان ۾ مستقل امن سان اسان جي معيشت تي مثبت اثر پوندا. صدر چيو ته پاڪستان 40 لک افغان پناهگيرن کي پناهه ڏني آهي، جيڪي قومون اسان کي انسانيت ۽ اخلاق جو درس ڏين ٿيون اهي ڪورونا خلاف اسان جي حڪمت عملي کي ساراهينديون آهن، ڪورونا خلاف موجوده حڪومت جي بروقت فيصلن مان نه رڳو عوام فائدو حاصل ڪيو آهي. قومي معيشت کي فائدو ڏنو. هن چيو ته پاڪستان جي سمورين فوجن ملڪ جي دفاع ۽ ڏکي جي هر گھڑی ۾ پنهنجو مثبت ڪردار ادا ڪيو آهي، سائبر جنگ ٻين خطرناڪ هٿيارن کان وڌيڪ خطرناڪ آهي، سائبر حملن کان بچاءَ لاءِ به تيار رهڻو پوندو.

Author: Tariq Sandilo

Leave a Reply

Your email address will not be published.